Bashkëpunimi në fushën e transportit ndërmjet Kosovës dhe Shqipërisë

Bashkëpunimi ndërmjet Kosovës dhe Shqipërisë në fushën e transportit: Ministri shqiptar i Transportit dhe Infrastrukturës Edmond Haxhinasto u takua me ministrin e Infrastrukturës së Kosovës, Lutfi Zharku, në kuadër të kontakteve të tij zyrtare në Prishtinë. Dy ministrat diskutuan për projektet e hekurudhave dhe autostradave që planifikohen të ndërtohen ndërmjet Kosovës dhe Shqipërisë.
Në konferencën e përbashkët për media të mbajtur pas takimit, ministri i Kosovës Zharku tha se takimi i sotëm është një nga takimet e nivelit të lartë të mbajtur në kuadër të modernizimit të komunikimit ndërmjet dy vendeve dhe tha se si palë kosovare, ata janë veçanërisht të interesuar për ndërtimin e “autostradës kombëtare” mes dy vendeve.
Duke iu referuar hekurudhës që planifikohet të ndërtohet mes dy vendeve, Zharku theksoi se vetëm 17 kilometra nga ky projekt është brenda kufijve të Kosovës dhe pjesa më e madhe e linjës është brenda kufijve të Shqipërisë. Zharku tha se janë të hapur për të gjitha llojet e bashkëpunimeve për ndërtimin e hekurudhave.
Ministri shqiptar i Transportit dhe Infrastrukturës Haxhinasto tha gjithashtu se bashkëpunimi në fushën e transportit dhe infrastrukturës është thelbësor për integrimin e dy vendeve dhe “rrugën europiane”.
Duke u shprehur se Shqipëria dhe Kosova janë “partnerë strategjikë”, Haxhinasto theksoi se një tjetër çështje për të cilën dy vendet mund të bashkëpunojnë është përdorimi i porteve shqiptare. Haxhinasto vuri në dukje se së shpejti nga institucionet përkatëse do të përgatitet një paketë e veçantë që do të inkurajojë biznesmenët kosovarë të përdorin më shumë portet shqiptare.